久違的遊記來了！
數數手指我們都好幾年沒出遊過夜，有小狗始終比較難走開，而且本人男友又勁忙
所以襯上年年尾生日我要求去個小旅行啦！
就由男友去安排，當中甩甩漏漏緊有，但都好多謝佢百忙之中去準備呀 : )
今次就決定去想去好耐的珠海御溫泉
聽講內地 D 溫泉唔係好乾淨，其實都有少少擔心，不過爬左好多文之後都覺得御溫泉印象良好喎！我地係經御溫泉 Facebook 訂套票，2 日 1 夜加自助餐合共 HK$2180，去完都覺得物有所值的！
當日 12:30 船，男友帶錯我去尖沙咀碼頭 =,.= 好在我地預 D 時間好鬆動
船程約 1 小時，落左船就跟御溫泉提供的地圖搵上車地點 (套票已包專車接送)
車程約 70mins，入到御溫泉範圍周圍都古式古香，環境唔錯
我地入住係日式裝修的雲來客棧，3pm 先可以 check in
兩部 lift 都各有特式，另一部仲有個馬桶XD
2 樓大堂
走廊都好靚
入到房簡直嘩嘩聲，好大好似去左日本咁！
估計可以訓到 6~8 人
覺得大得滯無安全感都可以拉埋屏風，用黎換衫都得
小茶几都可以收埋
一入門口左邊係廁所，右邊係洗手盆，提供的 Body Lotion 係好香的艾詩
整體都好乾淨企理，比想像中好好多
可惜就係無浴缸，不過都 24 小時無限浸溫泉架啦！
我都直接去溫泉個邊沖埋涼先上房，所以就冇用到企缸
茶包都有４種咁多
另一重點就係呢套浴衣
周圍都見人著住，唔駛怕羞架！
女仔粉紅色，男仔藍色，冬天會有埋件外套仔
本想同男友影下合照，但佢唔係好理我XD
最後我就自拍算
此情此景真係想吟番首詩 (爆)
影完房就出去視察下環境先！
因為落雨地下好濕，所以我著波鞋(請忽略)
仲特登帶左男友送的長洲手信魚仔袋去襯套衫，其實顏色唔係好襯，不過冇咩機會用到嘛
可惜我沒為魚仔留倩影，唔緊要留番下次啦 : )
因為套票已包自助餐，所以都係影比大家睇，聽講自助餐超多野食架 (流口水)
唔食自助餐的朋友都唔驚無啖好食
門口仲有一隻驢友同一隻牛牛，驢友好得意，佢會食你比 D 草
呢排咁凍唔知佢地點 (擔心)
周圍係影相位，但我比較心急想去浸溫泉多D XDDD
6pm自助餐先開始，我地決定去左一轉溫泉先！上房換泳衣出發
去另一橦就係浸溫泉的地方了
如果門口有接待人員佢地每次都會鞠躬迎送，好好服務
登記用指紋，之後每次去對番指紋就入得
另一邊就有條商店街，唔記得帶泳衣都可以買，仲有零食野飲賣
其實我唔知影唔影得相，我見人人都係咁影，職員又冇出聲
第一次唔知都冇帶電話入去，之後都有帶番，佢仲提供埋防水袋比人放電話用
不過我都影左幾張就算，專心浸溫泉同傾下計嘛！
文字描述下溫泉先...
入面又係古式古香幾靚，有超過 10 個溫泉，熱度都好唔同
我記憶中就有紅酒、黃酒、咖啡、香薰、按摩、椰奶、足浴等等...
個人最 like 香薰泉，因為好香薰衣草味，水溫又夠熱，堅舒服！
部分泉仲會因時間轉唔同口味同洗池，想浸頭啖泉可以記低時間
另外我推介大家可以去訓下地熱帶，訓住暖笠笠的雲石(聽講下面係流動溫泉水?!)，有少少微風，閉目休息下都好爽，地熱帶都幾受歡迎，要搵位都有 D 難度
乾淨毛巾櫃周圍都有，濕左隨時換都可以
另外場內都有唔同飲料免費供大家補充水分，有綠茶蜜、紅棗水、茉莉花茶、薑茶、羅漢果水、汽水等等，可以自由斟，亦有專人周圍派，味道都唔錯的，又好夠熱，我飲左唔少
試幻想一下個身浸住好熱的溫泉水，然後飲冰凍可樂係幾爽，其實唔健康架，一杯好喇:P
服務員仲會主動幫手整理大家的拖鞋，令大家方便穿上，服務真係比想像中好得多
仲有一個泳池，我掂過 D 水係凍，本身帶埋微鏡想玩下水，但原來晚上會封池 (溫泉開 24 小時)
浸夠又可以去大廳休息下，有生果、三文治、奶茶咖啡汽水供應 (都係免費的)
但記得入大廳要著番衫，唔可以單穿游衣入，更衣室有多套金色套裝提供，直接著上就 OK
食完休息完又可以去浸過
因為太多相想 Post 喇！太長都係分上下篇，下篇帶大家睇下勁多野食的自助餐！
努力執相中...
就這樣
沒有留言:
張貼留言