來談談巴氏腺囊腫...*

最近又經歷了一次很痛苦的巴氏腺囊腫復發，雖然有經驗但每次都會不停問問Google大神，發現大部分詳細分享都係國內，估唔到「知乎」超多同道中人！

但香港只有幾個討論區有講，當中仲有好多花生友叫樓主貼相先知咩情況......賤！根本認真討論嘅人都好少。有見及此我想打一篇自身經歷等同道中人可以參考，就好似我早幾年 share 過耳前廔管切除手術，呢幾年都唔少人問我意見 / 詳情，其實打文都係想咁啫:)

▐ 記錄▐ 耳前廔管切除手術。過程...*

- - - 回到正題 - - - 

巴氏腺位於兩邊大陰唇，主要功能係分泌黏液濕潤陰部，當發生性行為時分泌物會增多，讓性事更順暢，不致產生撕裂傷及疼痛感。  

如果巴氏腺塞咗，加上細菌感染、發炎，就會愈來愈腫痛，用 4 個字形容會係「寢食難安」 如果好早期發現睇醫生食藥可能都仲可以壓制，但本人3次最後結果都是等成熟放膿就即時唔痛了。

第一次

實際年齡已經唔記得，好似係中學定大專？！

詳細過程都唔係好記得，只記得好痛又好驚唔知咩事，特登搵咗個間有女醫生嘅診所睇，醫生檢查完即刻話：「含膿喎！幫你放咗佢啦！」就手起刀落無麻醉之下用針吉一吉再徒手吱啲膿出嚟，痛到我喺診所尖叫。

個次經歷真係畢生難忘！不過放完膿好快就好番唔痛了！印象中之後有藥同有藥膏搽，當時仲未知係巴氏腺囊腫，只係覺得陰唇生瘡。

第二次

無記錯應該係上年年頭，又係同一位置總之都係好痛好痛，WTF相隔咗咁多年又重遇......但有第一次經驗知道放完膿就冇事已經無咁驚，我好似係有去睇醫生嘅！醫生無檢查，有比藥膏同食藥。

以下過程真係唔好學，而我都唔會再咁做㗎喇！

有一晚真係頂唔順，我自己消毒支針同手，自己幫自己放膿，只記得放咗啲黃黃綠綠嘅膿同痛到係咁喊之後又唔再痛了，我到而家都唔明點解當時可以落到針...

不過我記得之後痾第一督尿係勁拿，應該係尿接觸到傷口，不過好快就無事。

當時都仲未知叫巴氏腺囊腫，仍然覺得係生瘡。

第三次

呢次可以詳細講喇！無錯我係到呢次先知學名叫 --- 巴氏腺囊腫 

早2星期日好happy食完好好味鹹酥雞之後星期一番番下工覺得下體同一位置有異物感，去廁所檢查一睇：「Shit！又嚟！」

如果當時我有好好正視試下坐浴同睇醫生可能會壓得住，但人類總要重複同樣的錯誤！

之前睇醫生食剩咗消炎藥咁我覺得消炎就無事咪試下食，又好似真係好啲喎！但因為剩番消炎藥唔多，食晒佢又繼續腫痛，上年支藥膏因為用左好少所以仲 keep 住又未過期都照早晚搽，但完全無好轉，因為疫情之下又唔敢好似上次咁自己搞，好驚有傷口細菌感染，去到中期先試坐浴係有舒緩痛楚但實際無乜幫助。

時好時壞咁過咗10日最後都係死死地去睇醫生，好好彩係女醫生，檢查完佢開咗抗生素同止痛藥（廢㗎！) 仲話唔係好嚴重希望抗生素可以收到佢，比我好大信心唔洗再經歷多次痛不欲生嘅放膿過程。

乖乖食藥休息早訓食清淡，點知只係食咗一日藥，朝早起身去廁所發現有血omg

我已經知粒野熟到爆咗，我好冷靜地洗手消毒，一睇已經見到白色膿頭，唔洗用力都已經吱到勁多膿出嚟，吱到只係出血水先收手，之後用熟水清潔再印乾水份，用棉花棒搽早一日買定嘅必妥碘就完成成個放膿過程，同樣地放完膿係即刻唔再腫痛！3次入面呢次放膿係最唔痛的！

之後痾第一督尿仍然係勁拿好痛，要自己調較個動作令啲尿唔接觸到傷口就無事，但每次去完都用熟水清潔再印乾之後搽番必妥碘，始終疫情下都要小心處理，仲要食晒手上嘅抗生素，唔好食食下唔食會有抗藥性！

第四次 (12/2021)

係呀！半年之後又嚟料！仲要係近聖誕同生日...

一有少少異物感我已經即刻去睇醫生加坐浴，今次係男醫生，都係要觸診，不過我都冇咩尷尬了，醫生話好初期本身開抗生素藥膏（之前用過覺得好似冇咩用...)，我真係唔想聖誕同生日要經歷等佢熟再爆，我問醫生會唔會有消炎藥，最後佢話咁不如開口服抗生素啦！

日日準時食抗生素同繼續坐浴，仲有沖涼時用熱水加陰力按摩吓腫脹位置
清淡飲食(戒辣避上火野)同早Ｄ訓

用熱水坐浴真係好D，但都係時好時壞

有日去樓上買嘢，諗起知乎有人教飲 / 薰蒸金銀花水有用

就買咗一包，好大包要成 70 蚊！

由於唔識點薰蒸，我就直接用黎坐浴
因為爬文見 BB 都可以用黎沖涼，咁我諗坐浴都應該 OK！

10G 金銀花沖洗幾次，凍水落煲滾 15 分鐘再焗一陣
習慣沖涼前較時間開始煲，沖完涼隔渣溝熱水再坐浴 15 分鐘

浸咗一次已經勁 Work，本身有少少腫浸完消咗好多

連續浸咗 3 晚加上抗生素已經冇晒發炎徵狀！！！！！！
之後黎 M 因為金銀花屬涼性，我就冇再浸

唯一一次壓得住唔洗再經歷痛不欲生過程真係好感動

諗住之後會睇中醫調理下身子，唔想再復發呀~~~~~~~~~~~~

預防方法

應該好多人都想知究竟點預防，其實佢就好似唇瘡咁一但中過就好易復發，只係嗰排抵抗力一弱就可能會復發。

其他都係嗰啲嘢：早啲訓、食清淡健康、唔好咁熱氣、做運動 etc.

即係大家都知但知易行難嘅嘢啦！我就應該係要早啲訓同食清淡嘅！

同埋再有下次 (touchwood) 盡快睇醫生！！！！！！

呀！仲有要著全棉底底，仲要定期更換，唔好成日著貼身褲 / leggings，唔好用護墊，保持陰部乾爽 etc.

好喇！終於打完，希望幫到大家，並祝各位身體健康 :)