決定左結婚第一件事係搵師傅擇日，日子出左就立即去 Site Visit
因為婚展優惠比較多，一心諗住睇岩就去婚展落訂
因為男女家都在元天屯上呢幾個地區，為方便長輩出入一早已經決定元朗擺
元朗酒樓都幾多，搵一日睇左六間之後決定揀煌府！
上面係停車場，離西鐵站都唔算遠
可以拎番本呢 D 一次過睇晒咁多間煌府分店
元朗場個佈局主要分 A 同 B 場
我地預計擺 15-20 圍，目標係 A1，B 場就完全唔會考慮，經理話如果當晚無乜客係可以比埋 A2，當然一切睇經理決定，比係人情唔比都無得嘈，好好彩我當晚係用晒成個 A 場，感覺鬆動好多！
揀煌府除左因為係婚宴專家外，我係比佢呢條浮誇到爆天橋吸引！
當時係覺得反正都係一於玩大佢啦XDDD
本野真係要拎，因為有埋菜單可以比較
無翅宴我堅決轉燕窩，在此多謝所有家人支持！
最後要符合 min pay 同得體少少，我地揀左呢個餐
酒水係婚展講左好耐都只係講到 $200 /圍 (B餐)
我覺得自己真係唔識講價...
我知有朋友擺百日宴係free到，唔知有冇人擺婚宴都可以free到呢？
酒水連 Tips 同加一，埋單一圍約 $8500
問番親友都幾滿意當晚菜式 (實在太好了！)
婚展 join 的 jetso 係夠 15 圍以下可以揀一樣 free
包括：3件婚紗/禮服、律師証婚、花車、MC、席前鋼琴伴奏同糖果回禮 Set
一致覺得揀律師証婚好似最實際，出面平平地請一個都幾千蚊
但因為元朗係偏遠最後都加左 $500，$500 就請到律師我都覺得好抵，而當晚律師都好專業
成個場都係紫色 x 白色為主，個場雖然已經好多年但目測都幾新淨唔會好殘舊
個人名牌我自己整架！真係好靚！(之後應該會開 Blog 講下)
哥哥拖我註冊進場，D 燈光效果好好
切假蛋糕好好笑XDD
另外酒樓有送 8 磅結婚蛋糕註冊後切 (蛋糕個樣好老土好似係粉紅色心型)，席前連同小食分比賓客，我哥話好好食，席前小食都聽到唔少好評，我食過都覺得幾好食呀！
合巹交杯
祝酒儀式
個臺都好夠大，團體照完全無難度
我都係睇番相先知有出動泡泡機，事前完全唔知，除左我老公個樣之外=.="成件事好浪漫
當晚成日流程都好順利，係有一樣突發事發生，就係臨進場先知個裙撐前後調轉左，當刻大家都好緊張不停瘋狂轉反正個裙撐lol
不過煌府員工應變能力好高，佢地用對講機內外配合，最後係冇咩人知有意外之下好順利解決左成件事！呢點真係要讚！
總結：當晚全個流程都好順利，親友賓客 feedback 都係正面，我媽就最鐘意個旋轉升降舞台話好靚好靚，另外個新娘房同廁所都好大，同一時間有 5-6 個人係入面都唔會迫到轉唔到身，大家都好滿意呢個場地。
最後再簡單講下睇左其他酒樓先！
名匯呢個場我知就已經轉左幾手，10幾年前貓家姐都係呢度擺
個場呈長方形無柱位，本身我幾滿意，15-20 圍已經可以包全場
不過位置唔近鐵路，附近雖然有停車場但好難搵位泊車
而老公唔鐘意個場對正大馬路，已經有屏風隔住都唔鐘意喎！
好在最後冇揀到，因為差唔多結婚前發現佢已經轉左手裝修緊，真係好好彩
奉獻大家如果搵細酒樓簽合約前要多口問下租約到幾時
喜尚嘉喜正正就係名匯隔離，見近近近地先睇埋
個隔局一般，第一印象已經唔鐘意，加上職員態度麻麻，好快睇完就閃
紅爵御宴都係附近先睇埋，個場好舊，上去到好似時光倒流去左 80 年代酒樓咁XD
睇完都係忘記佢啦！
富臨皇宮都叫近近地西鐵站，樓底好高，但中間好多柱位唔鐘意
朗屏稻香，當時個場新開無耐，近近地西鐵站
但貓家姐話 D 野好難食千萬唔好揀XDDD
而佢個婚宴菜單又真係平喎，不過唔好食幾平都無用...
我地只係行過門口，入都無入去就走左
以上就係我地快速搵酒席場地經過，好慶幸大家都沒什麼要求，地點又一早定好，所以好快就揀好喇！不過之後都因為家人緊張某 D 合約字眼問題拉鋸左一段時間，幸好最後都順利解決晒！
希望呢篇都可以幫到同樣搵緊場地擺酒的朋友仔 : )
沒有留言:
張貼留言